Nytt styremedlem: Mette Karlsvik

Mette vaks opp på Frei i Møre og Romsdal, og tok artium på Red Cross Nordic United World College før ho utdanna seg til biletkunstnar, forfattar, dramatikar og journalist ved Glasgow School of Art, Skrivekunstakademiet i Hordaland og Norsk Barnebokinstitutt, m.a.

Mette byrja å jobbe fulltid som skrivande kunstnar da ho fekk Tarjei Vesaas Debutantpris for romandebuten [Samlaget, 2005], og har – uansett om ho skriv scenetekst, poesi eller roman – jobba meir dokumentarisk/journalistisk i researchfasen, med feltarbeid og intervju, og tett kontakt med den store historia, så vel som skjebna til einskildsmenneske.

Som dramatikar har Mette i hovudsak jobba på det frie feltet, ofte i samarbeid med regissør Jon Tombre. Deira tverrkunstnarlege prosjekt «Surtsey LAVALOVE», til dømes, var hovudframsyning på Høstscena 2021.

Ein viktig del av Mettes virke som skrivande kunstnar, har vore å jobbe for vilkåra til andre kunstnarar i Noreg. Ho har hatt tillitsverv på kunstfeltet sidan 2010, i Den norske Forfatterforening, Norsk faglitterær forfatter- og oversetterforening, Bjørnsonakademiet, Statens kunstnarstipend og meir. Sidan 2020 har ho vore tilsett i fagadministrasjonen til Kulturdirektoratet, der ho jobbar med tidsskrift og kritikk.

Mette gjekk NBUs og NBIs pilotutdanning i dramatisk skriving for barne- og ungdomsbokforfattere i 2010 - 2011, og debuterte som dramatikar på Dramatikkens hus i 2011.